0
Shares
सुरुङ्गा सम्बाददाता,बरहथवा ५ पुस
सुरुङ्गा खबर। सर्लाही जिल्लाको बरहथवा नगरपालिका वडा नम्बर–१० स्थित नमुना माध्यमिक विद्यालय, सीतापुरको खेल मैदानमा आजदेखि सीतापुर प्रिमियर लिग क्रिकेट प्रतियोगिता भव्य रूपमा सुरु भएको छ। वडा कार्यालयको आर्थिक सहयोगमा प्रत्येक वर्ष निरन्तर रूपमा आयोजना हुँदै आएको उक्त प्रतियोगिताले यस वर्ष पनि स्थानीय युवाहरूमा ठूलो उत्साह सिर्जना गरेको छ।
प्रतियोगिताको उद्घाटन समारोहमा बरहथवा नगरपालिका वडा नम्बर–१० की वडा अध्यक्ष सर्मिला कुमारी राम प्रमुख अतिथिको रूपमा उपस्थित रहनुभएको थियो। उहाँले रिबन काटेर प्रतियोगिताको औपचारिक उद्घाटन गर्नुभयो। उद्घाटन समारोहलाई सम्बोधन गर्दै वडा अध्यक्ष रामले खेलकुदले युवालाई अनुशासित, स्वस्थ र जिम्मेवार नागरिक बनाउने महत्वपूर्ण भूमिका खेल्ने बताउनुभयो। उहाँले युवाहरूलाई कुलतबाट टाढा राख्न तथा सकारात्मक ऊर्जालाई सही दिशामा प्रयोग गर्न यस्ता खेलकुद प्रतियोगिताहरू आवश्यक रहेको उल्लेख गर्नुभयो।
वडा अध्यक्ष रामले वडा कार्यालयले खेलकुद विकासलाई प्राथमिकतामा राख्दै आएको र आगामी दिनहरूमा पनि यस्ता प्रतियोगितालाई निरन्तर सहयोग गर्ने प्रतिबद्धता व्यक्त गर्नुभयो। उहाँले खेलकुद केवल मनोरञ्जन मात्र नभई सामाजिक एकता, भाइचारा र नेतृत्व विकासको माध्यमसमेत भएको बताउनुभयो।
उक्त प्रतियोगिताको आयोजना मेरी गोल्ड युवा क्लबले गरेको हो। आयोजक संस्थाले प्रतियोगिता सफल बनाउन सहयोग गर्ने वडा कार्यालय, स्थानीय समाजसेवी, खेलप्रेमी तथा स्वयंसेवकहरूप्रति आभार व्यक्त गरेको छ। साथै, प्रतियोगितामा सहभागी सबै टिम र खेलाडीहरूलाई खेल भावना, अनुशासन र मर्यादाको पालना गर्दै प्रतिस्पर्धामा उत्रन आग्रह गरिएको छ।
स्थानीय तथा वरपरका क्षेत्रबाट सहभागी टिमहरूको सहभागितासँगै सुरु भएको प्रतियोगिताले ग्रामीण स्तरमा लुकेका प्रतिभाहरूलाई उजागर गर्ने अवसर प्रदान गर्ने अपेक्षा गरिएको छ। प्रतियोगिताले युवाहरूबीच आपसी सद्भाव, सहकार्य र स्वस्थ प्रतिस्पर्धाको वातावरण सिर्जना गर्ने विश्वास लिइएको छ।
सीतापुर प्रिमियर लिग क्रिकेट प्रतियोगिताले खेलकुद विकाससँगै सामाजिक एकता मजबुत बनाउने र आगामी दिनहरूमा स्थानीय स्तरमै खेलाडी उत्पादन गर्न महत्वपूर्ण योगदान पुर्याउने आयोजकहरूको भनाइ रहेको छ।
