अवैध ओसारपसारमा सशस्त्रको कडा प्रहार — १ लाख ६० हजारको सामान भन्सारमा बुझाइयो

बिष्णु राम जेठ ११ पर्सा
सुरुङ्गा खबर, सप्तरी। सशस्त्र प्रहरी बल नेपाल, प्रस्तावित सिमा गुल्म अलौको टोलीले सर्लाहीका विभिन्न स्थानहरूबाट ओसारपसारमा ल्याइएका अवैध कपडा र किराना सामग्री बरामद गरी १ लाख ६० हजार रुपैयाँ बराबरको सामान भन्सारमा बुझाएको छ।

सशस्त्र प्रहरी निरीक्षक कृष्ण पुजारा सिंहको कमान्डमा खटिएको टोलीले सीमावर्ती क्षेत्र हुँदै भित्र्याइँदै गरेको ती सामान नियन्त्रणमा लिएको हो। नियमित गस्ती र सूचनाका आधारमा गरिएको निगरानीपछि सामान नियन्त्रणमा लिइएको बताइएको छ।

बरामद सामग्रीलाई आवश्यक कानुनी प्रक्रिया पूरा गरी सम्बन्धित भन्सार कार्यालयमा बुझाइएको सशस्त्र प्रहरी गुल्म, अलौले जानकारी दिएको छ। यस प्रकारको कारवाहीले सीमा क्षेत्रमा हुने अवैध ओसारपसार र तस्करी नियन्त्रणमा सशक्त सन्देश दिएको स्थानीयवासीले प्रतिक्रिया जनाएका छन्।

“सीमामा अब अवैध कारोबार सजिलै सम्भव छैन,” सशस्त्र प्रहरी निरीक्षक सिंहले बताए, “सिमा सुरक्षाका साथै आर्थिक शुद्धताको लागि हाम्रो टोली निरन्तर सक्रिय छ।”

सशस्त्र प्रहरीको यस सक्रियताले सीमावर्ती क्षेत्रमा सुरक्षा चुस्त रहेको सन्देश दिएको छ भने ओसारपसारमा संलग्न गिरोहहरूलाई समेत चेतावनी दिएको छ।